Помощь сайту:

Молитвы

Молитва иконе Божией Матери “Грузинская”(1658 г.). Из молитвослова 1909 г. издания.

Приими, всеблагомощная Пречистая госпоже Владычице Богородительнице, сия честныя дары от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой сущей ту и послушающей моления наша и подающи с верою просящим по коемуждо прошению и исполнение: скорбящим скорби облегчаеши, немощным здравие даруеши, расслабленных и недужных исцеляеши и от бесных бесы прогониши,. обидимыя от обид избавляеши, и насилуемых спасаеши, грешных прощаеши,. Прокаженных очищаеши и малых детей милуеши, и неплодныя от неплодства разрешаеши. Еще, госпоже Владичице, от уз и темниц свобождаеши и всякия многоразличныя страсти исцеляеши и очныя болезни уврачуеши и от смертоносныя язвы избавляеши: вся бо возможна суть ходатайством Твоим к Сыну Твоему,. Христу Богу нашему. О всепетая Мати, Пречистая Богородице! Не престай молити о нас недостойных раб Твоих, славящих Тя и почитающих, и поклоняющихся Пречистому образу Твоему, и надежду имущих невозвратну, и веру несумненну, к Тебе Приснодеве, преславней и непорочной, славящих и чтущих, и поющих Тя во веки веков. Аминь.

Молитва 2-я

К Тебе Богоизбранная отроковице, Пресвятая Дево Богородице, небесе и земли Царице, припадающе, вопием: услыши молений наших глас и не отврати лица Твоего от нас недостойных. Приими, всеблагая, от недостойных раб Твоих, чтущих всечестное имя Твое и с верою покланяющихся Тебе пред чудотворным Твоим образом, приносимое ныне теплое моление наше: вознеси к Престолу Сына Твоего, Христа Бога нашего, да милостив будет к неправдам нашим и не воздаст нам по делом нашим, но да пробавит щедроты Своя. Вемы, яко несмы достойни, по грехом нашим, от Него помиловати быти, аще не Ты, Владычице умолиши Его о нас: вся бо можеши испросити у Него, матернее бо к Нему имаши дерзновение. Сего ради к Тебе, яко всемощней и всеблагой заступнице нашей, прибегаем, усердно молящееся: испроси у рождшагося от Тебе единароднаго Сына Божия, Христа Бога нашего, всем нам в святоотечестей Православней вере твердое, до конца дней наших, пребывание и во всех заповедех Господних неуклонное хождение, да прочее время живота нашего поживше во всяком благочестии и чистоте, сподобимся мирныя христианския кончины и добраго ответа на страшнем суде Сына Твоего и Бога нашего и тако достигнем, под кровом Твоея помощи, живота вечнаго во Царствии Отца светов, Емуже купно со единородным Его Сыном и Святым Духом, подобает слава,. честь и поклонение, ныне и присно и во веки веков. Аминь.

Молитва Святого преподобного Нила Сорского к Божией Матери Грузинская

О Пресвятая Владычице моя Богородице, ангелов и архангелов, херувимов и серафимов Пречестнейшая, всех святых Пресвятейшая, Дево Мати Божия! Спаси мя, смиреннаго и грешнаго раба Твоего. Ты бо веси, Всемилостивая Госпоже, яко всю мою надежду по Бозе на Тя возлагаю, и несть ми инаго прибежища спасительнаго, токмо Ты, Всеблагая. Ты моя крепость, Владычице, Ты моя и сила, Ты мое радование в скорбех, Ты мое пристанище во искушениих, Ты мое исправление в падениих, Ты и спасение мое всенадежное, о Мати Зиждителя и Господа моего! Помози ми, плавающему в пучине жития сего, люте обуреваемому и бедствующему от потопления греховнаго. Даждь ми руку помощи, Помощнице моя, и избави мя от тимения глубины, да не погрязну в бездне отчаяния; буря бо грехов и страстей возста на мя, и волны беззаконий погружают мя. Но Ты, Милосердая Мати, во пристанище безстрастия настави и спаси мя, безнадежных Надеждо и Ходатаице спасения моего.

Молитва иконе Божией Матери Грузинская из АкафистаПресвятей Владычице нашей Богородице прославления ради чудотворныя Ея иконы “Грузинская”

Величие и милости Твоя, Богородице, кто исповест; и чудеса Твоя преславная кто воспоет; Церкве Российския верныя чада обрадовала еси, Пречистая, безбожныя же варвары, Святыню Твою презревшия посрамила еси: сохранила бо нам чудную Твою икону, ею же недуги наша врачуются и душевные скорби исцеляются.

О, Всемилостивая Владычице, Дево Богородице, не лиши нас и ныне Твоего покрова, но молитвами Твоими присно страну нашу и люди в мире сохраняй и восстановлению Раифской обители способствуй.

Яко Мати Святая Пресвятаго Бога, Владычице, Марие Богородице, со всеми Святыми Сего моли покоити в небесных селениях души раб Твоих, новых мучеников и исповедников Раифских: Архимандрита Феодосия (Лузгина), Уб. Игумена Сергия (Гуськова), Уб. Иеромонаха Антония (Чиркова), Уб. Иеромонаха Иосифа (Гаврилова), Уб. Иеромонаха Варлаама (Похилюка), Уб. Иеромонаха Иова (Протопопова), Иеромонаха Митрофана (Кириллова), Иеродиакона Иеронима (Сорокина), Иеродиакона Порфирия (Советникова), Монаха Савватия (Агафонова), Монаха Геласия (Терехина), Монаха Нестора (Никитина), Диакона Александра Себельдина, Уб. Послушника Петра Тупицына, Послушника Петра Ранцева. Уб. Василия Гаврилова, Уб. Степана Абрамова.

Тропарь, глас 4-й

Днесь светло красуется обитель Красногорская, и с нею ликовствует Раифская пусьтыня, яко зарю солнечную, от востока возсиявшую, восприимши, Владычице, чудотворную Твою икону , еюже разгоняеши мглу искушений и бед от вопиющих верно: избави обительнашу и вся страны Христианския от всех навет вражиих, и спаси душа наши, яко милосердная заступница рода Христианского.

Тропарь, глас 5-й

Веселяться Православныя народи, видяще Владычице Дево Богородице, Твою пречудную и чудотворную икону, и приемлют врачество душевное и телесное Твоею милостию всегда. Темже и мы, покланяющиеся оней, усердно тебе вопием: помилуй, благая Мати, смиренныя рабы Твоея, и избави нас от всякого зла и навета вражия, молящи Сына Твоего Господа, Иисуса, да, спасшеся зде, небесное жительство получим человеколюбие и благодатию Его.

Величание

Величаем Тя, Пресвятая Дево, Мати Христа Бога нашего, и чтем образ Святый, от Него же источаеши исцеления всем, с верою к Тебе притекающим.